महायुतीचे अखेर ठरले !! देवेंद्र फडणवीसच होणार मुख्यमंत्री !! एकनाथ शिंदे आणि अजित पवारांना उपमुख्यमंत्रीपद !!

मुंबई-पोलीस नायक (वृत्तसेवा) :-

दि.२५ नोव्हेंबर २४ सोमवार

राज्यात नुकत्याच झालेल्या विधानसभा निवडणुकीत महाविकास आघाडीचा धुव्वा उडवत महायुतीने जोरदार मुसंडी मारली आहे.आता निवडणुकीच्या निकालानंतर सत्तास्थापनेसाठी हालचाली सुरू झाल्या आहेत.अशात महायुतीमधून भाजपाचे देवेंद्र फडणवीस यांची मुख्यमंत्रीपदी वर्णी लागणार असल्याची माहिती समोर आली आहे. भाजपाच्या केंद्रीय नेतृत्त्वाने मुख्यमंत्री म्हणून देवेंद्र फडणवीस यांच्या नावाला मंजूरी दिली असून शिवसेना आणि राष्ट्रवादीनेही या निर्णयला होकार दिला आहे.भाजपा मधल्या दोन उच्चपदस्थ नेत्यांनी दिलेल्या माहितीनुसार इंडियन एक्सप्रेसने याबाबत वृत्त दिले आहे.याचबरोबर एकनाथ शिंदे आणि अजित पवार हे नव्या सरकारमध्ये उपमुख्यमंत्री असणार आहेत.केंद्रीय गृहमंत्री अमित शहा यांनी संध्याकाळी दिल्लीत शिंदे,फडणवीस आणि पवार यांच्यासमवेत सत्तावाटपाचा तपशील आणि मंत्रिमंडळ रचना यावर चर्चा करण्यासाठी बैठक बोलावली असून त्यानंतर घोषणा अपेक्षित आहे.शिवसेनेला सुमारे १२ मंत्रीपदे मिळण्याची शक्यता असून यामध्ये काही महत्त्वाच्या खात्यांचाही समावेश आहे.दुसरीकडे राष्ट्रवादीलाही जवळपास १० मंत्रिपदे मिळणार आहेत.१३२ आमदार असलेल्या भाजपाच्या वाट्याला २१ मंत्रीपदे येण्याची शक्यता आहे.गृह,अर्थ,नागरी विकास आणि महसूल ही प्रमुख चार खाती भाजपा आपल्याकडे ठेवण्यास उत्सुक आहे.भाजपा गृह आणि अर्थ खात्यासाठी आग्रह धरू शकते असे भाजपच्या अंतर्गत सूत्रांचे म्हणणे आहे.