“भगव्या मोर्चानंतर समनापुरात दोन गटात दगडफेक”;दोषींवर कडक कारवाईचे पोलिसांचे निर्देश

अहमदनगर जिल्ह्यातील संगमनेर तालुक्यात हिंदुत्ववादी संघटनांनी काढलेल्या भगव्या मोर्चानंतर संगमनेर शहराजवळी समनापूर गावात दोन गटात तुफान राडा झाला आहे.भगवा मोर्चावरून परत येणाऱ्या काही तरुणांनी समनापूरमध्ये दगडफेक केल्याचा आरोप स्थानिकांनी केला असून या दगडफेकीत पाच गाड्यांचे आणि दोन मोटरसायकलचे नुकसान झाले आहे तसेच काही लोक जखमीही झाले असल्याचे सूत्रांकडून सांगण्यात आले आहे.संगमनेरमधील भगवा मोर्चावरून परतत असताना ही घटना घडली असून घटनेची माहिती मिळताच जिल्हा पोलीस अधीक्षक राकेश ओला,अप्पर पोलीस अधीक्षक स्वाती भोर,डी.वाय.एस.पी.सोमनाथ वाकचौरे,पोलीस निरीक्षक भगवान मथुरे यांनी घटनास्थळी धाव घेऊन जमावाला शांत केले आहे तसेच जखमींना उपचारासाठी रुग्णालयात दाखल करण्यात आले आहे.या घटनेनंतर समनापुरात तणावपूर्ण शांतता असून मोठा पोलीस बंदोबस्त तैनात करण्यात आला आहे.पोलिसांनी हे कृत्य करणाऱ्यांवर कडक कारवाई करण्यात येणार असल्याचे सांगितले आहे.