मिंधे सरकारचा कारभार घोषणांमध्ये ‘गतिमान’ आणि प्रत्यक्ष कामात ‘गतिमंद’ – सामनातून हल्लाबोल

महाराष्ट्रात गतिमान सरकार आल्याची पुंगी मुख्यमंत्री शिंदे व उपमुख्यमंत्री फडणवीस वाजवत असतात.आपले सरकार ‘डबल इंजिन’वाले आहे असे ते म्हणतात पण इंजिनास ‘तेलपाणी’ करण्यासाठी त्यांना वारंवार दिल्लीच्या सर्व्हिसिंग स्टेशनला जावे लागते.यालाच जर हे लोक गतिमान सरकार म्हणत असतील तर काय बोलायचे? सत्य असे आहे की तथाकथित गतिमान सरकारचा वेग बैलगाडीपेक्षा कमी आहे अशी टीका यातून करण्यात आली आहे.वर्षभरापासून मंत्रिमंडळाचा विस्तार होऊ शकलेला नाही आणि विस्तार व्हावा यासाठी मिंधे-फडणवीस दिल्लीस हेलपाटे मारून थकले आहेत.जे सरकार वर्षभर मंत्रिमंडळाचा विस्तार करण्याची हिंमत दाखवू शकले नाही त्यांनी गतिमानतेच्या गोष्टी कराव्यात याचे आश्चर्य वाटते.मुख्यमंत्री-उपमुख्यमंत्र्यांनी शपथ घेतल्यावर पहिला विस्तार करायला ४१ दिवस लागले व त्या विस्तारास नऊ महिने होऊन गेले तरी दुसऱ्या विस्ताराचा पाळणा हलायला तयार नाही कारण सगळाच ‘वांझ’ कारभार सुरू आहे.पाळणा इकडे व दोरी हलवणारे दिल्लीत असे चित्र आहे अशी टीका ठाकरे गटाने केली आहे.

डबल इंजिनवाल्या सरकारची कमाल कशी ती पहा.गेल्या दोन वर्षांपासून महाराष्ट्राची राजधानी मुंबईस महापौर नाही.मुंबई नगरी महापौरविना उघडीबोडकी आहे.महापौर नाही,महापालिकेत लोकनियुक्त सरकार नाही.मंत्रालयातून त्यांना हवा तसा कारभार हाकला जात आहे.बरे महापौर व निवडणुका का नाहीत? तर निवडणुका घेतल्या तर शिवसेनेचाच महापौर होईल या भयाने गतिमान सरकारने मुंबईच्या महापौरपदाचा कोंबडा झाकला आहे.भारतीय जनता पक्षाची बदके अधूनमधून आमचाच महापौर असे सांगत आहेत त्यावर गतिमान मिंधे गट बोलायला तयार नाही असेही टीकास्त्र सोडण्यात आले आहे. भाजपचे वनमंत्री सुधीरभाऊ मुनगंटीवार यांच्या खात्यात अधिकाऱ्यांच्या बदल्यांमध्ये भ्रष्टाचार झाल्याचा आरोप इतर कोणी नाही तर भाजपच्याच चार आमदारांनी केला आहे.याआधीही मिंधे मंत्रिमंडळात लाखो रुपयांच्या बदल्यात वर्णी लावून देण्याच्या ‘तोतयेगिरी’चा पर्दाफाश भाजपच्याच एका आमदाराने केला होता.पुन्हा हा तोतया स्वतःला भाजपच्या राष्ट्रीय अध्यक्षांचा पीए म्हणवून घेत होता.आता तो गजाआड असला तरी राज्यातील मिंधे-फडणवीस सरकारचा ‘लेनदेन’चा ‘गतिमान’ कारभार या प्रकरणातूनही समोर आला होताच.वास्तवात मिंधे सरकारचा कारभार घोषणांमध्ये ‘गतिमान’ आणि प्रत्यक्ष कामात ‘गतिमंद’ असाच सुरू आहे असा हल्लाबोलही या अग्रलेखातून करण्यात आला आहे.