“जर काही झाले तर त्याला जबाबदार फक्त देशाचे आणि राज्याचे गृह मंत्रालय” -सुप्रिया सुळे यांचा इशारा

राष्ट्रवादी काँग्रेसचे अध्यक्ष शरद पवार यांना सोशल मीडिया अकाऊंटवरून जीवे मारण्याची धमकी आल्याचे समोर आले असून “तुमचाही लवकरच दाभोलकर होणार”,अशी धमकी शरद पवारांना देण्यात आली आहे तसेच त्या पोस्टमध्ये त्यांना शिवीगाळही करण्यात आली आहे. या प्रकरणाचे पडसाद राज्याच्या राजकीय वर्तुळात उमटू लागले आहेत.शरद पवारांच्या कन्या आणि राष्ट्रवादी काँग्रेसच्या खासदार सुप्रिया सुळे यांनी यासंदर्भात मुंबई पोलीस आयुक्तांची भेट घेऊन रीतसर तक्रार दाखल केली आहे त्यावर आयुक्तांनी तातडीने कार्यवाही करणार असल्याचे सांगितले आहे असे सुप्रिया सुळे यांनी प्रसारमाध्यमांशी बोलतांना सांगितले आहे.मुंबई पोलीस आयुक्तांची भेट घेतल्यानंतर सुप्रिया सुळेंनी माध्यम प्रतिनिधींशी संवाद साधला यावेळी त्यांनी राज्य सरकारवर तीव्र शब्दांत हल्लाबोल केला.“मला व्हॉट्सअॅपवर आज हा मेसेज आला.एका वेबसाईटवरून अशी धमकी दिली जात आहे.त्या व्यक्तीच्या फॉलोअर्सच्याही काही कॉमेंट्स आल्या आहेत हे आक्षेपार्ह आहे. अशा धमक्या आल्या असतील तर गृहमंत्रालयाने याची नोंद घ्यावी.मी मुंबईच्या पोलीस आयुक्तांना यासंदर्भात माहिती दिली आहे.शरद पवारांना ज्या पद्धतीने ही धमकी आली आहे ते दुर्दैवी आहे असे सुप्रिया सुळे यावेळी म्हणल्या.