“आमच्याच पक्षाच्या विरोधात निवडणुका लढायच्या व आमच्याच मेळाव्यात न बोलावता यायचे हे कसे खपवून घेणार?”

नागपूर-पोलीस नायक (वृत्तसेवा) :-

राज्य पातळीवर भाजपा व शिवसेनेच्या शिंदे गटात सर्वकाही आलबेल नाही अशा बातम्या येत असतानाच रविवारी पारशिवनीमधील भाजपा मेळाव्यात पक्षाचे माजी आमदार मल्लिकार्जून रेड्डी यांनी थेट उपमुख्यमंत्री देवेंद्र फडणवीस व भाजपा प्रदेशाध्यक्ष चंद्रशेखर बावनकुळे यांच्यासमोर शिंदे गटाचे आमदार आशीष जयस्वाल आणि खासदार कृपाल तुमाने यांच्या उपस्थितीवर आक्षेप घेत त्यांचे येथे काम काय?असा थेट सवाल केला त्यामुळे स्थानिक पातळीवरही युतीमध्ये असंतोष असल्याचे स्पष्ट झाले आहे.जिल्ह्यातील सर्व मतदारसंघात जाऊन सरकारी योजनांचा आढावा व पक्षाचा मेळावा घेण्याचा उपक्रम उपमुख्यमंत्री देवेंद्र फडणवीस यांनी हाती घेतला आहे.या उपक्रमात रविवारी त्यांनी रामटेक मतदारसंघाची आढावा बैठक रामटेकमध्ये तर पक्षाचा मेळावा पारशिवनीमध्ये आयोजित केला होता.सरकारी आढावा बैठक असल्याने त्यात लोकप्रतिनिधी म्हणून शिंदे गटाचे आमदार आशीष जयस्वाल आणि खासदार कृपाल तुमाने उपस्थित होते.फडणवीस तेथून मेळाव्यासाठी पारशिवनीला आले त्यांच्यासोबत जयस्वाल आणि तुमानेही आले.भाजपाच्या मेळाव्यात शिंदे गटाचे आमदार,खासदार पाहून रामटेकचे भाजपाचे माजी आमदार डी.मल्लिकार्जून रेड्डी संतापले त्यांनी त्यांच्या भाषणात भाजपाच्या मेळाव्यात शिवसेना (शिंदे गट) आमदार, खासदारांचे काम काय?असा थेट प्रश्न व्यासपीठावर फडणवीस आणि बावनकुळे यांच्याकडे बघून उपस्थित केला व दोघांच्या उपस्थितीवर आक्षेप घेतला.