शिंदे गटाच्या तुलनेत राष्ट्रवादीच्या मंत्र्यांच्या वाट्याला महत्त्वाची खाती

मुंबई-पोलीस नायक (वृत्तसेवा) :-

दि.१४ जुलै २३ शुक्रवार

राष्ट्रवादीत बंड करून भाजपबरोबर जाण्याचा निर्णय घेतलेल्या अजित पवार यांच्या नेतृत्वाखालील गटाला वित्त,सहकार,कृषी,महिला व बालकल्याण यासारखी महत्त्वाची खाती वाट्याला आली आहेत.शपथविधीनंतर तब्बल १३ दिवसांच्या प्रतिक्षेनंतर राज्य मंत्रिमंडळाचे खातेवाटप जाहीर करण्यात आले.राष्ट्रवादीत बंड करणाऱ्या अजित पवार यांच्या गटाने चांगली खाती मिळावीत अशी मागणी केली होती.भाजपने अजित पवार यांच्याशी पाठिंब्याच्या वाटाघाटी केल्या तेव्हाच त्यांच्याकडील कोणती खाती सोडणार याचे आश्वासन दिले होते.मुख्यमंत्री एकनाथ शिंदे यांनी त्यांच्या गटाकडे असलेली महत्त्वाची खात सोडण्यास नकार दिला होता यातून गेले आठवडाभर खातेवाटपाचा घोळ सुरू होता. शेवटी प्रफुल्ल पटेल आणि अजित पवार यांना मध्यस्थीसाठी नवी दिल्लीत केंद्रीय गृहमंत्री अमित शहा यांच्याकडे धाव घ्यावी लागली होती यानंतरच खातेवाटपाचा तिढा सुटला.अजित पवार यांच्याकडे वित्त खाते सोपविण्यास शिंदे गटाच्या आमदारांनी विरोध दर्शविला होता कारण महाविकास आघाडी सरकारच्या काळात शिवसेनेच्या आमदारांची निधीवरून अजित पवार यांच्या विरोधात नाराजी होती.शिंदे यांच्या बंडाला निधी वाटपाचे कारणही जबाबदार होते.राष्ट्रवादीत बंड करतानाच अजित पवार यांना भाजपच्या नेतृत्वाने वित्त खात्याचे आश्वासन दिले होते यामुळेच शिंदे गटाने विरोध करूनही वित्त खाते हे अजित पवार यांच्याकडे सोपविण्यात आले आहे.सहकार हा राष्ट्रवादीचा मूळ पाया आहे यामुळे सहकार खात्याची मागणीही मान्य झाली आहे.