“गुरुजींना अटक करण्याची भाषा करता तुम्हाला जगायचे आहे का”?

राज्य विधानसभेच्या पावसाळी अधिवेशनामध्ये कराड दक्षिणचे आमदार पृथ्वीराज चव्हाण यांनी संभाजी भिडे यांना महात्मा गांधी यांच्याबाबत केलेल्या आक्षेपार्ह व वादग्रस्त वक्तव्याबद्दल तत्काळ अटक करावी अशी मागणी सभागृहात केली होती यावर विधानसभेत एकच गोंधळ उडाला होता तर दुसरीकडे महाराष्ट्रभर काँग्रेसच्या पदाधिकारी व कार्यकर्त्यांनी संभाजी भिडे यांच्यावर कारवाईच्या मागणीसाठी आंदोलन केले होते.त्यानंतर काल शनिवारी रात्री साडेबाराच्या सुमारास पृथ्वीराज चव्हाण यांना ई-मेलवरून ‘गुरुजींना अटक करा म्हणून बोलतो काय जिवंत राहायचे आहे का?अशी धमकी देण्यात आली.आज दि.३० जुलै रविवार रोजी सकाळी पृथ्वीराज चव्हाणांचे कार्यालय सुरू झाल्यानंतर त्यांचे सहाय्यक ई-मेल तपासत असतांना हा धमकीचा ई-मेल निदर्शनास आला त्यांनी तत्काळ याची माहिती पृथ्वीराज चव्हाण यांना दिली त्यानंतर हा प्रकार पोलिसांना कळवण्यात आला त्याअनुषंगाने पोलीस एकंदर प्रकाराची  माहिती घेत आहेत.हा ई-मेल कोणाच्या मेलवरून आला? तो कुठून पाठवला? ई-मेल करणारी व्यक्ती कोण? ई-मेल पाठवणाऱ्या व्यक्तीने बोगस ई-मेल अकाउंटचा वापर केला आहे किंवा काय? याबाबतची नेमकेपणाने माहिती घेतली जात आहे.दरम्यान हे गैरकृत्य करणारा अंकुश सौरते यास नांदेड येथे पोलिसांनी पकडले असून त्याला ताब्यात घेण्यासाठी कराड पोलिसांचे पथक तिकडे रवाना झाल्याचे पोलीस उपअधीक्षक अमोल ठाकूर यांनी सांगितले आहे.