“शाईस्तेखानाची बोटे छाटणारा महाराष्ट्र झुरळांच्या मिश्यांची पर्वा कशाला करेल?”-ठाकरे गटाची संभाजी भिडेंवर अप्रत्यक्ष टीका

मणिपुरात हिंसेचा आगडोंब पेटला असतांनाच भारतीय जनता पक्षाच्या उपवस्त्रांनी आता हरयाणातही हिंसा भडकवून अनेकांचे बळी घेतले तसेच मालमत्तेचे नुकसान केले व दहशतीचे वातावरण निर्माण केले.हरियाणाची आग राजधानी दिल्ली आणि राजस्थानातही पेटू शकते तशी तयारी झाल्याची माहिती आहे.हरियाणा व राजस्थानात लवकरच विधानसभा निवडणुका होतील त्याची ही पूर्वतयारी दिसते.इकडे महाराष्ट्रात देवेंद्र फडणवीसांच्या गुरुजींनी महात्मा फुले,संत साईबाबा,म.गांधी,पंडित नेहरू यांच्यावर घाणेरड्या भाषेत चिखलफेक करून माहोल बिघडवला आहे असा आरोप ठाकरे गटाने संभाजी भिडे यांच्यावर केला आहे.लोकसभा निवडणुकीपूर्वी हे असे जातीय व धार्मिक तणावाचे वातावरण निर्माण करायचे व जागोजागी ढोंगी हिंदुत्वाच्या घंटा वाजवून प्रचारात उतरायचे असे एकंदरीत कारस्थान दिसते.त्या पूर्वतयारीसाठी विश्व हिंदू परिषद,बजरंग दल,फडणवीसांची गुरुजी ब्रिगेड अशा फौजांना आधीच मैदानात उतरवले गेले आहे.महाराष्ट्रात फडणवीसांच्या गुरुजींनी महात्मा फुल्यांवर घाणेरडे विधान केले तरीही फुल्यांचे वैचारिक वारसदार छगनराव भुजबळ हे फडणवीसांच्या मांडीस मांडी लावून सरकारात बसले आहेत.सत्तेसाठी विचारांना तिलांजली असेच एकंदरीत हे धोरण आहे असे टीकास्र ठाकरे गटाने छगन भुजबळ यांच्यावर सोडले आहे.