‘भुजां’मध्ये कितीही ‘बळ’ आहे असे म्हटले तरी नीतिमत्तेचे ‘तट’ फोडून सत्तेसाठी घातलेला हा ‘वळसा’ महाराष्ट्राला ‘पटेल’ का? वाह रे पट्ठ्या !!

निवडणूक आयोगाच्या या निकालावर वेगवेगळ्या राजकीय प्रतिक्रिया येऊ लागल्या आहेत.महाराष्ट्र नवनिर्माण सेनेनेही यावर प्रतिक्रिया दिली आहे.मनसेने या निकालावर भाष्य करताना उपमुख्यमंत्री अजित पवार यांना लक्ष्य केले आहे.मनसेने एक्स या मायक्रोब्लॉगिंग प्लॅटफॉर्मवर एक पोस्ट केली आहे या पोस्टमध्ये म्हटले आहे की,बुजुर्ग काकांनी उभा केलेला पक्ष दुसऱ्याच्या बळावर हिसकावणे सोप्प आहे पण बुजुर्ग नेत्याचा अवमान न करता स्वतःच्या बळावर स्वतःचा पक्ष उभा करणे,चिन्ह मिळवणे यासाठी राज ठाकरे यांच्यासारखा संघर्ष आणि संयम लागतो, हिंमत लागते… असो,त्यांचे राजकारण त्यांना लखलाभ ! यापाठोपाठ मनसेने आणखी एक पोस्ट एक्सवर केली आहे यामध्ये मनसेने अजित पवार यांच्या जुन्या भाषणाचा काही भाग शेअर केला आहे.निवडणूक आयोगाने मंगळवारी राष्ट्रवादी काँग्रेस पक्षाबाबत जो निकाल दिला. असाच काहीसा निर्णय काही महिन्यांपूर्वी शिवसेनेबाबतही दिला होता.निवडणूक आयोगाने शिवसेना पक्ष आणि पक्षाचे चिन्ह शिंदे गटाला दिले आहे.या निकालावर अजित पवार यांनी नाराजी व्यक्त केली होती.अजित पवार तेव्हा विधानसभेचे विरोधी पक्षनेते होते.अजित पवार आपल्या भाषणात म्हणाले होते,अरे ज्यांच्या वडिलांनी पक्ष काढला आणि तो वाढवला,मुंबईच्या शिवाजी पार्कवर या पक्षाची स्थापना केली आणि हा पक्ष महाराष्ट्राच्या सर्वदूर पोहोचवला त्यांचाच पक्ष तुम्ही काढून घेतलात त्यांचे चिन्ह काढून घेतलंत.निवडणूक आयोगाने जरी निर्णय दिला असला तरी हा निर्णय जनतेला पटलाय का? त्याचा विचार झाला पाहिजे.तुमच्यात धमक होती तर स्वतःचा काढा,तुम्हाला कोणी अडवले होते ? यासह मनसेने म्हटले आहे की,‘भुजां’मध्ये कितीही ‘बळ’ आहे असे म्हटले तरी नीतिमत्तेचे ‘तट’ फोडून सत्तेसाठी घातलेला हा ‘वळसा’ महाराष्ट्राला ‘पटेल’ का? वाह रे पट्ठ्या !!