“निवृत्त न्यायाधीशांनाही कळू लागले आहे की,न्यायपालिकेचे स्वातंत्र्य धोक्यात येत आहे” ‘त्या’ पत्रावरून जितेंद्र आव्हाडांची टीका

मुंबई-पोलीस नायक (वृत्तसेवा) :-

दि.१६ एप्रिल २४ मंगळवार

सर्वोच्च न्यायालय आणि देशभरातील उच्च न्यायालयातील २१ निवृत्त न्यायाधीशांनी सरन्यायाधीश धनंजय चंद्रचूड यांना पत्र लिहून न्यायपालिकेला कमकुवत करण्याचा प्रयत्न होत असल्याबाबत चिंता व्यक्त केली असून देशातील काही विशिष्ट घटक मोजूनमापून दबाव व चुकीची माहिती आणि सार्वजनिक अप्रतिष्ठा यांच्या माध्यमातून न्यायपालिकेला कमकुवत करण्याचा वाढत्या प्रमाणात प्रयत्न करत आहेत असा इशारा त्यांनी या पत्रातून दिला आहे याबाबत जितेंद्र आव्हाड यांनीही आता टीका केली आहे.देशातील २१ निवृत्त न्यायाधीशांनी,‘न्यायपालिकेचे स्वातंत्र्य अबाधित ठेवावे’,असे पत्र सर्वोच्च न्यायालयाचे सरन्यायाधीश धनंजय चंद्रचूड यांना लिहून कळविले आहे व ही बाब देशाच्या दृष्टीने अतिशय गंभीर आहे असे जितेंद्र आव्हाड म्हणाले.स्वातंत्र्यानंतर अशा पद्धतीने कोणत्याही न्यायाधीशाला कोणत्याही निवृत्त न्यायाधीशांनी पत्र लिहिले नव्हते.इलेक्ट्रोल बाँड आणि त्यावरून न्यायपालिकेत झालेले वाद-युक्तिवाद त्यावर न्यायालयाने दिलेला निर्णय व यानंतर देशातील ६०० वकिलांनी जे पत्र दिले होते ते पत्रच मूळात न्याय पालिकेवर दबाव आणणारे होते.निवृत्त न्यायाधीशांनी दिलेल्या पत्रात स्पष्टपणे म्हटले आहे की, न्यायपालिकेवर जो दबाव आणला जात आहे तोच मूळात अनाकलनीय व चुकीचा आहे.याचाच अर्थ स्पष्ट आहे की निवृत्त न्यायाधीशांनाही कळू लागले आहे की,न्यायपालिकेचे स्वातंत्र्य धोक्यात येत आहे.हे पत्र लिहिणारे जे न्यायाधीश आहेत त्यामध्ये सर्वोच्च न्यायालयातील ४ निवृत्त न्यायाधीश आणि देशभरातील विविध उच्च न्यायालयातील निवृत्त न्यायाधीशांचाही समावेश आहे अशी टीका जितेंद्र आव्हाडांनी केली आहे.