“हुकूमशाही लादण्यासाठी मोदी ‘एक राष्ट्र,एक नेता’ मोहीम राबवत आहेत” !! अरविंद केजरीवाल यांचा दावा

नवी दिल्ली-पोलीस नायक (वृत्तसेवा) :-

दि.१२ मे २४ रविवार

भाजप पुन्हा सत्तेवर आला तर २०२५ नंतर नरेंद्र मोदी नव्हे तर अमित शहा देशाचे नेतृत्व करतील कारण भाजपमध्ये वयाची ७५ वर्षे पूर्ण झाल्यानंतर निवृत्त व्हावे असा नियम आहे व या नियमानुसार मोदी पुढील वर्षी निवृत्त होतील त्यामुळे पंतप्रधान मोदी हे त्यांच्यासाठी नव्हे तर त्यांचे उत्तराधिकारी अमित शहा यांच्यासाठी मते मागत आहेत असा दावा दिल्लीचे मुख्यमंत्री अरविंद केजरीवाल यांनी काल दि.११ मे शनिवार रोजी केला आहे.मद्य धोरण घोटाळाप्रकरणी अंतरिम जामीन मिळाल्यानंतर केजरीवाल शुक्रवार रोजी तिहार तुरुंगातून बाहेर आले.आम आदमी पक्षाच्या कार्यालयात त्यांनी काल शनिवार रोजी कार्यकर्त्यांशी संवाद साधला.भाजपचे नेते इंडिया आघाडीच्या नेत्यांना विचारतात तुमचा पंतप्रधान कोण ? मात्र मी त्यांना विचारतो की तुमचा पंतप्रधान कोण होणार आहे ? कारण नरेंद्र मोदी पुढील वर्षी १७ सप्टेंबरला ७५ वर्षांचे होत आहेत.त्यांनीच असा नियम बनवला आहे की पक्षाचे जे सदस्य ७५ वर्षांचे आहेत त्यांना निवृत्त व्हावे लागेल.त्यांनी लालकृष्ण अडवाणी,मुरली मनोहर जोशी,सुमित्रा महाजन या नेत्यांना निवृत्त केले.या नियमानुसार मोदींनाही निवृत्त व्हावे लागणार आहे असे केजरीवाल यांनी सांगितले.