डोंबिवली बॉयलर स्फोट दुर्घटनेत सात जणांचा मृत्यू तर ४८ जखमी !! मृतांची संख्या वाढण्याची भीती !!

मुंबई-पोलीस नायक (वृत्तसेवा) :-

दि.२४ मे २४ शुक्रवार

डोंबिवली एमआयडीसी केमिकल कंपनीत काल दुपारी २ च्या सुमारास बॉयलरचा भला मोठा स्फोट आणि त्यानंतर छोटे स्फोट झाले असून या घटनेत सात कामगारांचा मृत्यू झाला आहे तर ४८ जण जखमी झाले आहेत.जखमींना उपचारासाठी विविध खासगी रुग्णालयांमध्ये दाखल करण्यात आले आहे.घटनास्थळी आगीचे लोळ आणि धुराचे लोट मोठ्या प्रमाणावर येत होते.नागरिकांनाही या घटनेचा मोठ्या प्रमाणावर त्रास झाला.या दुर्घटनेतील मृतांची संख्या वाढण्याची भीती आहे.उद्योगमंत्री उदय सामंत,खासदार श्रीकांत शिंदे यांनी घटनास्थळी जाऊन बचावकार्याची माहिती घेतली आणि पुढील निर्देश दिले आहेत.डोंबिवली एमआयडीसी फेज दोनमध्ये अंबर केमिकल कंपनीत दुपारी २ ते २.३० च्या सुमारास मोठा स्फोट झाला.या कंपनीतील बॉयलरचा स्फोट झाला.या स्फोटाचे हादरे तीन ते चार किलोमीटर परिसरात जाणवले यामुळे इमारतींच्या काचाही फुटल्या तसेच काही वाहनांचेही नुकसान झाले आहे.आग नियंत्रणात आणण्यासाठी शर्थीचे प्रयत्न सुरु आहेत.धुराचे लोट आणि आगीचे लोळ मोठ्या प्रमाणावर असल्याने बचाव कार्यात अडथळे येत होते.आता या घटनेत सात जणांचा मृत्यू झाला आहे.उद्योगमंत्री उदय सामंत यांनी तीन मृत्यू झाल्याची माहिती दिली होती.आता उपमुख्यमंत्री देवेंद्र फडणवीस यांनी या घटनेत सात जणांचा मृत्यू झाल्याची माहिती दिली आहे.एक्स पोस्ट करत देवेंद्र फडणवीस यांनी ही माहिती दिली आहे.