पंढरपूर येथील श्री विठ्ठल आणि रुक्मिणीमातेच्या पूजेसाठी आता ‘ऑनलाइन’ नोंदणीची सुविधा

पंढरपूर-पोलीस नायक (वृत्तसेवा) :-

दि.३० ऑगस्ट २४ शुक्रवार

पंढरपूर येथील श्री विठ्ठल आणि रुक्मिणीमातेची नित्यपूजा,पाद्यपूजा,तुळशीपूजा,चंदन उटी पूजा इत्यादी पूजा भाविकांना उपलब्ध करून देण्यात येतात व या पूजांसाठी मंदिर समितीने आता ‘ऑनलाइन’ पद्धतीने नोंदणी करण्याची सुविधा उपलब्ध करून दिली आहे यासाठीची संगणक प्रणाली विकसित करण्यात आल्याची माहिती कार्यकारी अधिकारी राजेंद्र शेळके यांनी दिली आहे.श्री विठ्ठल-रुक्मिणीमातेची पूजा करण्याची भाविकांची इच्छा असते.सद्य:स्थितीत प्रत्यक्ष मंदिर समितीकडे जाऊन जी पूजा करायची आहे त्याबाबत उपलब्धता आणि इतर गोष्टींचा सोपस्कार करावा लागतो मात्र बाहेरगावच्या भक्तांना पूजेची माहिती आणि पूजा करण्याची तारीख,वेळ घरबसल्या सहज आणि सुलभरीत्या निश्चित करता यावी अशी मागणी मंदिर समितीकडे आली होती.त्यानुसार मंदिरातील सर्व पूजांची नोंद ‘ऑनलाइन’ करता यावी यासाठी संगणक प्रणाली विकसित करण्यात आली असून भाविकांना पूजेची नोंदणी समितीच्या https://www.vitthalrukminimandir. org या अधिकृत संकेतस्थळावर करता येणार आहे.भाविकांना अल्प देणगी मूल्य आकारून विविध प्रकारच्या पूजा उपलब्ध करून देण्यात येतात.