“आमच्या वाट्याला बहुमत आले तरी ते अडथळे आणतील” !! संजय राऊतांचा गंभीर दावा

मुंबई-पोलीस नायक (वृत्तसेवा) :-

दि.२२ नोव्हेंबर २४ शुक्रवार

राज्यात येत्या २४ तासांत मतमोजणीला सुरुवात होणार आहे व या मतमोजणीकडे राज्यासह देशाचे लक्ष असणार आहे.अडीच वर्षांपूर्वी राज्यात झालेल्या राजकीय गोंधळानंतर आता राज्याच्या सत्तेच्या चाव्या कोणाकडे जातात याची उत्सुकता सर्वांनाच आहे.दरम्यान एक्झिट पोल्सनुसार महायुतीला स्पष्ट बहुमत मिळण्याची शक्यता आहे तर दुसरीकडे महाविकास आघाडीने या एक्झिट पोल्सवर विश्वास नसल्याचे म्हटले आहे तसेच राज्यात महाविकास आघाडीच्या १६० जागा निवडून येतील असा विश्वासही संजय राऊतांनी व्यक्त केला आहे.संजय राऊत म्हणाले,लोकसभेला मविआला १० जागाही मिळणार नाही असे म्हटले जात होते पण आम्हाला ३१ जागा मिळाल्या.सर्वेची ऐशी की तैशी.आम्ही काल एकत्र बसलो.महाराष्ट्रातील मतदान आणि मतदारांचा कौल यासंदर्भात जयंत पाटील,बाळासाहेब थोरात,अनिल देसाई यांच्यात चर्चा झाली.१६० जागा आम्ही सहज जिंकतोय हे (एक्झिट पोल) सर्वे कोणी आणि कसे केले.कसले हे एक्झिट पोल.आम्ही २६ तारखेला सरकार बनवतोय. एक्झिट पोल्सवर आमचा विश्वास नाही.सरकार अधिक मजबूत करायचे असेल तिथे लहान पक्ष आणि अपक्ष येतात पण आमच्याबरोबर शेतकरी कामगार वर्गाचे नेते, समाजवादी,डावे पक्षाचे आमदार येतील.अपक्ष उमेदवारांनीही पाठिंब्याची इच्छा व्यक्त केली आहे.एकनाथ शिंदे,देवेंद्र फडणवीस उशाला नोटांची बंडले घेऊन झोपतात व त्याशिवाय त्यांना झोप लागत नाही.गादीतही पैसे टाकून ठेवतात त्यांनी अपक्षांना ५० ते १०० कोटी ऑफर द्यायला सुरुवात केलीय याचा अर्थ आम्ही जिंकतोय.हे तुमच्या सर्वेवाल्यांना सांगा.त्यांना जिंकण्याची एवढी अपेक्षा असती तर त्यांनी आतापासून थैल्या पाठवल्या नसत्या लहान पक्ष आणि अपक्षांना असेही ते म्हणाले.