“यावेळी उटी,गुवाहाटी जाणार नाही तर जिवाची मुंबई करू” !! शिंदे गटाच्या नेत्याने सांगितले सत्ता स्थापनेसाठीचे ‘डेस्टिनेशन’ !!

मुंबई-पोलीस नायक (वृत्तसेवा) :-

दि.२२ नोव्हेंबर २४ शुक्रवार

एकनाथ शिंदे ज्या दिशेने जातील त्या दिशेने आम्ही जाऊ असे विधान संजय शिरसाट यांनी केले आहे त्यामुळे निवडणुकीनंतर मुख्यमंत्री एकनाथ शिंदे कुठे जाणार ? यावर चर्चा सुरू झाली आहे.२०२२ रोजी एकनाथ शिंदे यांनी बंड पुकारून अनेक आमदारांना सुरतवरून गुवाहाटीला नेले होते.गुवाहाटीनंतर गोव्यात आणि मग मुंबईत येऊन त्यांनी भाजपाशी हातमिळवणी करत सत्ता स्थापन केली होती.यावेळी विधानसभा निवडणुकीच्या निकालानंतर काय परिस्थिती असेल ? यावर चर्चा होत असतांना  विधानसभा त्रिशंकू होण्याची शक्यता वर्तविण्यात आली आहे.मग यावेळी उटी किंवा गुवाहाटी जाणार का ? असा प्रश्न शिवसेना शिंदे गटाचे प्रवक्ते संजय शिरसाट यांना विचारण्यात आला त्यावर त्यांनी यावेळी गुवाहाटीला जाणार नसल्याचे म्हटले आहे.मागच्या वेळी शिवसेना शिंदे गटाचे आमदार सूरत,गुवाहाटी आणि गोव्याला गेले होते त्यामुळे यावेळी निवडणुकीनंतर उटी जाणार की गुवाहाटी ? असा प्रश्न टीव्ही ९ वृत्तवाहिनीने संजय शिरसाट यांना विचारला होता यावर ते म्हणाले की,आम्हाला उटी किंवा गुवाहाटी कुठेही जाण्याची गरज भासणार नाही.आम्ही सगळे मुंबईतच जाऊन जीवाची मुंबई करू.आमदारांचा गटनेता निवडण्यासाठी सर्व आमदारांना एकत्र ठेवावे लागते त्यासाठी आम्ही सगळे मुंबईत जाऊ आणि तिथेच सत्तास्थापनेचा दावा केला जाईल.