नवी दिल्ली-पोलीस नायक (वृत्तसेवा) :-

दि.२१ मार्च २५ शुक्रवार

केंद्र सरकारने काल गुरूवारी देशाचे पंतप्रधान नरेंद्र मोदी यांच्या परदेश दौऱ्यांच्या खर्चाचा तपशील जारी केला असून यानुसार पंतप्रधान नरेंद्र मोदी यांच्या मे २०२२ ते डिसेंबर २०२४ या कालावधीत झालेल्या ३८ परदेश दौऱ्यावर जवळपास २५८ कोटी रुपये खर्च करण्यात आल्याची माहिती देण्यात आली आहे.या ३८ दौऱ्यांपैकी सर्वाधिक खर्च हा जून २०२३ मध्ये केलेल्या अमेरिका दौऱ्याच्या वेळी झाला होता.पंतप्रधान नरेंद्र मोदी यांच्या अमेरिका भेटीसाठी २२ कोटी रुपयांहून अधिकचा खर्च झाला असल्याचे पीटीआय या वृत्त वाहिनीने यासंबंधीचे वृत्त दिले आहे.ही माहिती परराष्ट्र राज्यमंत्री पबित्रा मार्गेरिटा यांनी काल गुरूवार रोजी राज्यसभेत एका प्रश्नाच्या उत्तरात दिली आहे.

दरम्यान विरोधी पक्षनेते मल्लिकार्जुन खरगे यांनी यासंबंधीचा प्रश्न विचारला होता.त्यांनी भारतीय दूतावासांनी गेल्या तीन वर्षांच्या कालावधीत पंतप्रधान नरेंद्र मोदी यांच्या परदेश दौऱ्यांसाठी एकूण किती खर्च केला याबद्दल खरगे यांनी विचारणा केली होती.ज्यामध्ये हॉटेल व्यवस्था,सामूहिक स्वागत समारंभवाहतूक याबरोबरच इतर खर्चाचा तपशील देखील विचारण्यात आला होता.या प्रश्नाला उत्तर देतांना पंतप्रधान नरेंद्र मोदी यांच्या परदेश दौऱ्यांसाठी झालेला खर्च तसेच अधिकार्‍यांवर झालेला खर्च,सोबत असणारे लोक,माध्यम डेलिगेशन,सुरक्षा व्यवस्था इत्यादींवर झालेल्या खर्चाचा तपशील देण्यात आला असून सविस्तर देण्यात आलेली ही माहिती मे २०२२ ते डिसेंबर २०२४ या काळात पंतप्रधान नरेंद्र मोदी यांच्या दौऱ्यांची आहे.सरकारकडून देण्यात आलेल्या माहितीनुसार,जून २०२३ रोजी केलेल्या अमेरिका दौऱ्यावर तब्बल २२,८९,६८,५०९ रुपये इतका खर्च झाला होता तर सप्टेंबर २०२४ मध्ये केलेल्या अमेरिकेच्या दौऱ्यावर जवळपास १५,३३,७६,३४८ रुपये खर्च झाला आहे.दुसऱ्या काही महत्त्वाच्या दौऱ्यांपैकी पंतप्रधान नरेंद्र मोदी यांच्या मे २०२३ मधील जपान दौऱ्यावर १७,१९,३३,३५६ रुपये आणि नेपाळच्या मे २०२२ मधील दौऱ्यावर ८०,०१,४८३ रुपये खर्च करण्यात आला आहे.

कोणत्या देशांना भेटी दिल्या !!

पंतप्रधान नरेंद्र मोदी यांनी २०२२ आणि २०२४ यांच्या मध्ये जर्मनी,कुवेत,डेन्मार्क,फ्रान्स,यूएई,उझबेकीस्तान,इंडोनेशिया,ऑस्ट्रेलिया,इजिप्त,दक्षिण अफ्रिका,ग्रीस,पोलंड, युक्रेन,रशिया,इटली,ब्राझील,गयाना या देशांना भेटी दिल्या आहेत.

कोणत्या दौऱ्यावर किती खर्च झाला ? !!

पोलंड – १०,१०,१८,६८६ रुपये
युक्रेन – २,५२,०१,१६९ रुपये
रशिया – ५,३४,७१,७२६ रुपये
इटली – १४,३६,५५,२८९ रुपये
ब्राझील – ५,५१,८६,५९२ रुपये
गयाना – ५,४५,९१,४९५ रुपये

पंतप्रधान मोदींच्या मे २०२२ ते डिसेंबर २०२४ या काळातील ३८ दौऱ्यांचा खर्च सुमारे २५८ कोटी रुपये इतका आहे.मोदींच्या दौऱ्यांची तुलना करण्यासाठी मंत्र्यांनी २०१४ पूर्वी माजी पंतप्रधानांनी केलेल्या मागील परदेश दौऱ्यांच्या खर्चाची माहिती देखील देण्यात आली आहे.

२०१४ पूर्वी पंतप्रधानांच्या दौऱ्यांवर झालेला खर्च !!

अमेरिका (२०११) – १०,७४,२७,३६३ रुपये

रशिया (२०१३) – ९,९५,७६,८९० रुपये

फ्रान्स (२०११) – ८,३३,४९,४६३ रुपये

जर्मनी (२०१३) – ६,०२,२३,४८४ रुपये

आधीच्या दौऱ्यांसाठी आलेल्या खर्चांच्या आकड्यांमध्ये महागाई किंवा चलनातील चढउतार विचारात घेण्यात आलेले नाहीत.