यूएस जिओलॉजिकल सर्व्हेने (USGS) दिलेल्या माहितीनुसार हा भूकंप १० किलोमीटर खोलीवर होता व या भूकंपानंतर ६.४ तीव्रतेचा आणखी एक भूकंप झाला.या भूकंपानंतर म्यानमार व थायलंडने देशात आणीबाणी जाहीर केली आहे.दरम्यान म्यानमारला लागून असलेल्या चीनच्या नैऋत्य युनान प्रांतातही भूकंपाचे तीव्र धक्के जाणवले मात्र तिथे कुठलीही जीवितहानी झालेली नाही.मालमत्तेचे काही नुकसान झाले आहे का याची चौकशी केली जात आहे.या भूकंपाची तीव्रता इतकी होती की म्यानमारच्या शेजारील राष्ट्रांमध्ये (सीमा भागात) धक्के जाणवले.बांगलादेश,लाओस,चीन व भारतातही हे धक्के जाणवले.भारतात मणिपूर व पश्चिम बंगालमध्ये भूकंपाचे धक्के जाणवले सुदैवाने भारतात या भूकंपामुळे कुठलीही जीवितहानी झालेली नाही.पंतप्रधान नरेंद्र मोदी यांनी शुक्रवारी म्यानमार व थायलंडमध्ये झालेल्या भूकंपामुळे उद्भवलेल्या परिस्थितीबाबत चिंता व्यक्त केली.मोदी म्हणाले,अडचणीच्या प्रसंगी भारत या दोन्ही देशांच्या बरोबर उभा आहे. दोन्ही देशांना लागेल ती मदत करण्यास भारत तयार आहे.पाठोपाठ भारताने म्यानमार व थायलंडला मदत पाठवली आहे.म्यानमारच्या सागाइंगपासून १६ किलोमीटर उत्तर-पश्चिमेकडे ७.७ रिश्टर स्केल इतक्या तीव्रतेच्या भूकंपाचे धक्के बसले व या भूकंपाचे केंद्र २२.०१ उत्तर अक्षांश आणि ९५.९२ अंशावर होते.