यावल-पोलीस नायक(प्रतिनिधी) :-
वीरशिरोमणी महाराणा प्रतापसिंहजी यांनी अतुलनीय वीरता,शौर्य,बलिदान,स्वाभिमान आणि देशाभिमान यांचा आदर्श संपूर्ण मानव जातीसाठीच प्रस्थापित केला असून महाराजांची जयंती उत्सव शोभायात्रा व मिरवणुकीसहितच त्यांच्या जीवन संघर्षाची कथा वाचून घराघरात नव्हे तर मनामनात महाराणा अशा अर्थाने साजरी केली पाहिजे असे मत कॅप्टन डॉ.राजेंद्र राजपूत यांनी व्यक्त केले आहे.विरावली तालुका यावल येथील राजपूत समाज बांधवांच्या वतीने आयोजित वीरशिरोमणी महाराणा प्रतापसिंहजी यांच्या ४८३ व्या जयंती (तिथीनुसार) निमित्ताने आयोजीत कार्यक्रमात ते बोलत होते.
याप्रसंगी व्यासपीठावर फकीरा कान्हा पाटिल,कैलाश उखा पाटिल,डिगंबर विठ्ठल पाटिल,किशोर नरसिंग पाटिल,सैन्यदलातील अधिकारी महेंद्र पुंडलिक पाटील आणि सोनाली राजपूत आदी मान्यवर उपस्थित होते.प्रसंगी हिंदूसूर्य महाराणा प्रतापसिंहजी यांची तिथीनुसार जयंती ज्येष्ठ महिन्याच्या शुक्ल पक्षाच्या तृतीयेला अखंड भारतात साजरी केली जाते.मोघलांचे मांडलिकत्व शेवटच्या श्वासापर्यंत झुगारणाऱ्या, छोट्याशा मेवाडच्या बदल्यात अखंड हिंदुस्तानचा अर्धा भाग लाथाडणाऱ्या,प्रसंगी डोंगरदऱ्यात राहून भिल्ल व आदिवासींचे सहकार्य घेऊन अकबराला जेरीस आणणाऱ्या व स्वाभिमान,आत्मप्रतिष्ठा,स्त्रीसन्मान जागृत करणारा धगधगता यज्ञकुंड म्हणजेच वीरशिरोमणी महाराणा प्रतापसिंहजी.महाराणा प्रताप यांचा जीवनकाळ २२ मे १५४० ते १९ मे १५९७ असा एकूण ५७ वर्षाचा असून त्यातील २५ वर्षापेक्षा जास्त काळ संघर्षात गेला.यावेळी कुटुंबकलह ते हल्दीघाटीचा प्रवास व त्यानंतर मृत्यूच्या शेवटच्या क्षणापर्यंत गनिमी काव्याच्या माध्यमातून अकबराला जेरीस आणनारे विविध प्रसंग शब्दरूपाने उपस्थिता समोर मांडले.यासोबतच महाराणांनी स्वतःच्या जीवनातून समाजबांधवांना एक राजपूत लाख राजपूत या संदेशासहितच जीवनात संकटे येतच राहतील मात्र प्रत्येक संकटाचा सामना धैर्याने केला पाहिजे सर्व समाज बांधवांनी एकत्र राहूनच संघटन व सहकार्यातून समाजउद्धार साधला पाहिजे असे विवेचन केले.खरे तर घराघरात नव्हे तर मनामनात महाराणा प्रताप यांचे चरित्र वाचन,मनन व चिंतनाद्वारे पोहोचविण्याचे महतकार्य प्रत्येक राजपूत समाज बांधवांनी करावे असे आवाहन कॅप्टन डॉ.राजेंद्र राजपूत यांनी केले.
याप्रसंगी विरावली गावातील समाज बांधवांनी दि.२२ मे रोजी भव्य शोभायात्रेतून महाराजांची जयंती साजरी केली यासोबतच दि.२३ मे रोजी व्याख्यानाच्या माध्यमातून महाराजांचे जीवन चरित्र समजून घेतले.यासाठी परिसरातून विरावली ग्रामस्थ समाजबांधवांचे कौतुक व अभिनंदन केले जाते आहे.कार्यक्रमाचे प्रास्ताविक व सूत्रसंचालन भारतीय सैन्यदलातील महेंद्र पाटील यांनी केले.यावेळी त्यांनी ग्रंथालय,व्यायामशाळा व विविध महापुरुषांच्या जीवनचरित्रांच्या व्याख्यानमालेतून तरुणांनी स्वतःचे करिअर घडवावे व सोबतच समाज व देशासाठी विधायक भरीव योगदान द्यावे अशी आशा व्यक्त केली.कार्यक्रमाच्या यशस्वीतेसाठी माजी सरपंच ईश्वर धोंडूसिंग पाटिल,पोलीस पाटील चंद्रकांत देवीदास पाटिल,माधव मोतीराम पाटिल,सुनील कडू पाटिल,सागर पाटिल,राज त्र्यंबक पाटील,महेश चंद्रकांत पाटिल,रोहित अशोक पाटिल,नितिन संजय पाटिल यांचेसह समस्त विरवली ग्रामस्थ बांधवांनी परिश्रम घेतले तर यावेळी विरावली गावातील राजपूत समाज सह ग्रामवासी बंधू-भगिनी मोठ्या संख्येने उपस्थित होते.
