‘बिपरजॉय चक्रीवादळामुळे पाऊस लांबण्याची शक्यता’-भारतीय हवामान खात्याचा अंदाज

उन्हाच्या काहिलीपासून सुटका मिळवण्याकरीता पावसाची वाट पाहणाऱ्या नागरिकांना आता आणखी प्रतिक्षा करावी लागणार आहे कारण अरबी समुद्रात तयार होणाऱ्या चक्रीवादळामुळे पाऊस लांबणीवर पडण्याची शक्यता आहे.भारतीय हवामान खात्याने वर्तवलेल्या अंदाजानुसार अरबी समुद्रात बिपरजॉय चक्रीवादळ तयार होत असून याचा परिणाम केरळात धडकणाऱ्या मान्सूनवर होणार आहे परिणामी कोकणाच्या दिशेने सरकत येणारा मान्सूनही उशिरा होणार आहे.अरबी समुद्रात खोलवर हे चक्रीवादळ तयार होत असल्याने कोकण किनारपट्टीवर याचा फारसा परिणाम जाणवणार नाही तसेच या चक्रीवादळामुळे येणाऱ्या पावसाचीही शक्यता नाही परंतु मच्छिमार बांधवांना सावधानतेचा इशारा देण्यात आला आहे.मच्छिमारीसाठी खोल समुद्रात न जाण्याचे आवाहन हवामान खात्याने केले आहे.तसेच ८,९,१० जून रोजी कर्नाटकात गोवा-महाराष्ट्राचा किनारपट्टीच्या भागात वादळी वाऱ्याचा वेग ४०-५० KMPH असण्याची शक्यता आहे.या काळात नैऋत्य अरबी समुद्र,कर्नाटक-गोवा-महाराष्ट्र किनारपट्टीवर समुद्र खवळलेला असण्याची शक्यता आहे त्यामुळे मच्छिमारांनी समुद्रात जाऊ नये असे  ट्वीट पुणे हवामान विभागाचे प्रमुख के.एस.होसाळीकर यांनी केले आहे.