अवैध वाळू वाहतुक सर्जिकल स्ट्राइक कारवाई दरम्यान यावल तहसीलदारांच्या गाडीचा अपघात !! सुदैवाने जीवितहानी टळली !!

यावल-पोलीस नायक (प्रतिनिधी) :-

दि.०९ मे २५ शुक्रवार

तालुक्यातील तापी नदीच्या पात्रातुन सुरू असलेल्या अवैध गौण खनिज वाहतुकीला आळा घालण्यासाठी तहसीलदार मोहनमाला नाझीरकर यांनी आज दि.०९ मे शुक्रवार रोजी अत्यंत धाडसी कारवाई केली असून त्यांच्या या कार्यतत्परतेचे तालुक्यातून मोठे कौतुक केले जात आहे.

दरम्यान विदगाव ता.यावल या परिसरातील तापी नदी पात्रात ही कारवाई सुरू असतांना एक अवैध गौणखनिज भरलेला ट्रॅक्टर भरधाव वेगाने पळवण्यात येत असल्याचे निदर्शनास येताच तहसीलदार मोहनमाला नाझीरकर यांनी आपल्या पथकासह स्वतः त्या वाळूच्या ट्रॅक्टरचा पाठलाग सुरू केला.सदरहू पाठलाग सुरु असतांना त्यांच्या शासकीय वाहनाच्या ड्रायव्हरचा ताबा सुटून सदरील वाहन थेट नदी पात्रात उलटले.परंतु या अपघातात तहसीलदार व त्यांच्या पथकातील सर्व सदस्य सुदैवाने सुखरूप बचावले असून कोणतीही जीवितहानी झाली नाही मात्र शासकीय वाहनाचे मोठ्या प्रमाणावर नुकसान झाल्याचे सूत्रांकडून सांगण्यात आले आहे.दरम्यान सदर घटनेची माहिती मिळताच जळगावच्या तहसीलदार डॉ.उमा ढेकळे यांनी तातडीने घटनास्थळी धाव घेऊन जेसीबीसह बचावकार्य सुरू करून तहसीलदार मोहनमाला नाझीरकर व त्यांच्या पथकातील अधिकाऱ्यांना सुखरूप बाहेर काढण्यात आले.सदरहू प्रशासनाच्या या कार्यतत्परतेमुळे मोठा अनर्थ टळला असून याप्रकरणी संबंधित ट्रॅक्टर चालक व अन्य जबाबदार व्यक्तीं विरोधात यावल पोलीस ठाण्यात गुन्हा दाखल करण्यात आला आहे.या घटनेदरम्यान तहसीलदार मोहनमाला नाझीरकर यांच्या प्रशासनाच्या कार्यक्षमतेचे आणि महिलांच्या नेतृत्वाचे हे सशक्त उदाहरण कौतुकास्पद ठरले असून तहसीलदार मोहनमाला नाझीरकर यांच्या या धाडसी कार्याचे परिसरातून कौतुक करण्यात येत आहे.