“..असे संधीसाधू लोक गेले असतील तर त्यांची जागा आम्ही नक्कीच भरून काढू” अनिल परब यांची स्पष्टोक्ती
विधान परिषदेच्या उपसभापती आणि ठाकरे गटाच्या उपनेत्या डॉ.नीलम गोऱ्हे यांनी ठाकरे गटाला ‘जय महाराष्ट्र’ करत आज दि.७ जुलै रोजी एकनाथ शिंदे गटात सहभागी झाल्या आहेत.गोऱ्हेंनी ठाकरे गट सोडणे हा उद्धव ठाकरे यांच्यासाठी मोठा धक्का मानला जात आहे.गेल्या काही दिवसांपासून नीलम गोऱ्हे शिंदे गटात प्रवेश करणार असल्याच्या चर्चा सुरू होत्या या चर्चा अखेर खऱ्या ठरल्या आहेत.नीलम गोऱ्हे यांनी आज ठाकरे गटाला रामराम करत शिंदे गटात रीतसर प्रवेश केला या पक्ष प्रवेशावेळी मुख्यमंत्री एकनाथ शिंदे आणि उपमुख्यमंत्री देवेंद्र फडणवीस उपस्थित होते.दरम्यान नीलम गोऱ्हे यांच्या शिंदे गटातील प्रवेशानंतर ठाकरे गटाकडून यावर प्रतिक्रिया आली असून आमदार अनिल परब यांनी गोऱ्हे यांच्यावर टीका करतांना म्हटले आहे की,शिवसैनिकांच्या मेहनीतवर नीलम गोऱ्हे यांनी चार वेळा आमदारकी उपभोगली याबद्दल त्यांना माझ्याकडून शुभेच्छा परंतु ज्या शिवसैनिकांच्या जोरावर त्यांनी ही सगळी पदे उपभोगली त्या शिवसैनिकांना हे पाहून (नीलम गोऱ्हेंचा शिंदे गटातील प्रवेश) किती यातना होत असतील याचा विचार करावा.
आमदार अनिल परब म्हणाले की,आपल्याला काही मिळत नाही म्हणून पक्ष सोडणारे भरपूर आहेत असे असले तरी पक्षाच्या वाईट दिवसात लाखो कार्यकर्ते पक्षप्रमुख उद्धव ठाकरेंबरोबर आहेत त्यामुळे असे संधीसाधू लोक गेले असतील तर त्यांची जागा आम्ही नक्कीच भरून काढू त्याची काळजी आम्ही करत नाही.परंतु दुःखाची गोष्ट ही आहे की अशी सगळी पदे उपभोगल्यानंतर पक्षाला दगा देणे आणि वार करणे हे उच्च पदस्थ पदाधिकाऱ्यांना शोभत नाही.नीलम गोऱ्हे आता शिंदे गटात गेल्या आहेत त्यावर मी इतकेच सांगेन की त्यांना जी काही आश्वासने मिळाली असतील किमान ती पूर्ण व्हावीत एवढीच आमची अपेक्षा आहे.ना इकडच्या ना तिकडच्या अशी त्यांची अवस्था होऊ नये असे अनिल परब यांनी म्हटले आहे.
