बालाजी रथोत्सवात पक्षभेद,मतभेद विसरून भाजपा,उद्धव ठाकरे गट व शिंदे गटाचे कार्यकर्ते एकत्र

जळगाव-पोलीस नायक(प्रतिनिधी):-राज्यात सद्यस्थितीत शिवसेना कोणाची?व धनुष्यबाण कोणाचा आणि कोणाच्या दसऱ्या मेळाव्याला सर्वाधिक गर्दी जमली यावरून शिवसेना पक्षप्रमुख उद्धव ठाकरे आणि मुख्यमंत्री एकनाथ शिंदे यांच्या समर्थकांमध्ये रस्सीखेच पाहायला मिळाली तसेच पुढेही हीच परिस्थिती जनतेला पाहायला मिळणार आहे.तर दुसरीकडे हिंदुत्वाचे विचार नेमके कोणाचे यावरुन भाजप-शिवसेनेमध्ये चढाओढ लागली असल्याचे दिसून येत आहे.जळगावात मात्र उद्धव ठाकरे गट,शिंदे गट व भाजपचे नेते बालाजी रथाच्या कार्यक्रमाला एकत्र आल्याचे दिसून आले.एकीकडे राज्यात राजकीय संघर्ष सुरू असतानाच जळगावमध्ये तिन्ही गटाचे कार्यकर्ते एकत्र दिसून आल्याने अनेकांना आश्चर्याचा धक्का बसला.

धरणगावातील बालाजी रथाची तब्बल १२५ पेक्षा अधिक वर्षांची परंपरा आहे.बालाजी वाहनोत्सव मंडळाच्या वतीने सालाबादाप्रमाणे यंदाही बालाजी रथोत्सव साजरा करण्यात आला.या रथोत्सवासाठी भाजपचे नेते आणि मंत्री गिरीश महाजन,भाजपचे विधान परिषद आमदार चंदूलाल पटेल,भाजपचे खासदार उन्मेश पाटील,शिवसेनेचे उद्धव ठाकरे समर्थक सहसंपर्क प्रमुख गुलाबराव वाघ,धरणगाव नगरपालिकेचे माजी नगराध्यक्ष निलेश चौधरी तसेच शिंदे गटाचे पदाधिकारी भानुदास विसावे आणि इतर कार्यकर्तेही यावेळी उपस्थित होते.बालाजी रथ हा ट्रॅक्टरला जोडलेला होता व त्या ट्रॅक्टरचे स्टेअरिंग मंत्री गिरीश महाजनांनी हातात घेतले.यावेळी ट्रॅक्टरवर भाजप खासदार उन्मेश पाटील यांच्यासमवेत उद्धव ठाकरे गटाचे निलेश चौधरी हे बसलेले होते.महाजन हे बालाजी रथ असलेला ट्रॅक्टर चालवताना दिसून आले.या बालाजी रथोत्सवाच्या निमित्ताने पक्षभेद,मतभेद विसरून उद्धव ठाकरे गट व शिंदे गटाचे कार्यकर्ते तसेच भाजपचे पदाधिकारी एकत्र आल्याचे  पाहायला मिळाले.