कार व टेम्पो अपघातात दोन जण ठार तर चार जण गंभीर जखमी

लातूर-पोलीस नायक(वृत्तसेवा):- 

लातूरपासून जवळ असलेल्या भातांगळी पाटीजवळ एक भीषण अपघात झाला आहे.लग्नासाठी मुलगी पाहायला गेलेल्या सहा जणांवर काळाने घाला घातला असून कार आणि टेम्पोच्या भीषण अपघातात दोन जण जागीच ठार झाले तर चार जण गंभीर जखमी झाल्याची दुर्दैवी घटना लातूर जिल्ह्यात घडली आहे.

उदगीरमधील काहीजण एम.एच १३ सीएस ९९५५ क्रमांकाच्या कारने लातूरला मुलगी पाहण्यासाठी निघाले होते दुपारी ते लातूरपासून जवळच असलेल्या भातांगळी पाटीजवळ येताच समोरून एम.एच ४९ एल ४३७७ या क्रमांकाचा आयशर टेम्पो भरधाव वेगात आला.या दोन्ही वाहनांची समोरासमोर जोरदार धडक बसली या भीषण अपघातात कारचा अक्षरश: चक्काचूर झाला.या अपघातात उदगीरमधील समता नगरमधील रहिवासी तानाजी कुमदाळे आणि अन्य एक जण जागीच ठार झाले तर चार जण गंभीर जखमी झाले आहेत.घटनेची माहिती मिळताच पोलीस घटनास्थळी दाखल झाले.जखमींना उपचारासाठी लातूर येथील स्वर्गीय विलासराव देशमुख शासकीय वैद्यकीय रुग्णालयात उपचारासाठी तात्काळ दाखल करण्यात आले आहे.जखमींचा प्रकृती गंभीर असल्याचे सांगण्यात येत आहे.