“मला त्या पापात वाटेकरी व्हायचे नाही”, ठाकरे गटात प्रवेश करताच खासदार उन्मेश पाटलांचा भाजपावर गंभीर आरोप

मुंबई-पोलीस नायक (वृत्तसेवा) :-

दि.३ एप्रिल २४ बुधवार

जळगावचे विद्यमान खासदार उन्मेश पाटील यांनी आज दि.३ एप्रिल रोजी अधिकृतपणे शिवसेनेच्या ठाकरे गटात प्रवेश केला आहे.उन्मेश पाटील यांनी शिवसेना (उबाठा गट) पक्षप्रमुख उद्धव ठाकरे,खासदार संजय राऊत,खासदार अरविंद सावंत यांच्या उपस्थितीत ठाकरे गटाची मशाल हाती घेतली.उन्मेश पाटलांचे ठाकरे गटात स्वागत करतांना राज्यसभेचे खासदार संजय राऊत म्हणाले,जळगावासह उत्तर महाराष्ट्रातले एक नेतृत्व आज आपल्या शिवसेनेत सहभागी होत आहे त्यांच्याबरोबर पारोळ्याचे नगराध्यक्ष करण पवार आणि असंख्य पदाधिकारी व कार्यकर्ते देखील आज शिवसेनेत दाखल झाले आहेत तसेच अनेक संघटनांचे पदाधिकारी त्यांच्याबरोबर शिवसेनेत प्रवेश करत आहेत.उन्मेश पाटील हे निष्ठावंत भाजपा कार्यकर्ते म्हणून ओळखले जात होते परंतु निष्ठावंतांच्या नशिबी नेहमीच संघर्ष असतो म्हणूनच ते निष्ठावंतांची कदर करणाऱ्या शिवसेनेत आले आहेत.उन्मेश पाटील यांच्या शिवसेनेत येण्याने शिवसेनेला उत्तर महाराष्ट्रात ताकद मिळेल.

पक्षप्रवेशावेळी खासदार उन्मेश पाटील म्हणाले,महाराष्ट्राचा स्वाभिमान जागृत ठेवत भारताला मराठी बाणा दाखवणाऱ्या उद्धव ठाकरे यांच्या शिवसेनेत आज मी प्रवेश करत आहे.मी भाजपा सोडून ठाकरे गटात प्रवेश करत असल्याने मला अनेकजण विचारत आहेत की उमेदवारी मिळाली नाही म्हणून तुम्ही नाराज आहात का ? मी या सर्वांना स्पष्टपणे सांगू इच्छितो की,राजकारण करतांना आमदार,खासदार होणे हे एवढेच माझे ध्येय नव्हते.मी खूप चांगल्या हेतूने काम करत होतो परंतु राजकारणात काम करतांना व आमदार असतांना आज आपण जी शासकीय योजनांची जत्रा पाहतोय त्याचा पॅटर्न आम्ही चाळीसगावात राबवला होता व दुर्दैवाने त्याला किंमत मिळाली नाही.मी मागणी न करता मला मागील वेळेस लोकसभा उमेदवारी मिळाली परंतु यावेळी मला एका भावाने दगा दिला तरी दुसरा भाऊ म्हणजे शिवसेना माझ्याबरोबर आहे आणि याचा मला आनंद आहे.खासदार पाटील म्हणाले,आम्हाला बदल्याचे नव्हे तर बदलाचे राजकारण हवे आहे.यात पद महत्वाचे नाही परंतु आमची अवहेलना करण्यात आली,मला मानसन्मान नको,कार्यकर्त्याची अवहेलना होते तेव्हा तो घुसमटतो.राज्यात विकासाऐवजी विनाशाची व  बदलाऐवजी बदल्याची भावना रुजवली जात आहे परंतु मला त्या पापातला वाटेकरी व्हायचे नाही.आमचा स्वाभिमान जपला जात नसेल बैठकीला बोलावले जात नसेल तर स्वाभिमान गहाण ठेवण्याऐवजी मी या लढाईत सहभागी व्हायचे ठरवले आहे.क्रांतीची मशाल पेटवायचे ठरवले आहे.मी शब्द देतो की,मी पदासाठी किंवा खासदार होण्यासाठी इथे (ठाकरे गट) आलो नाही.उद्धव ठाकरे यांनी मला सांगितले आहे की,जळगावात शिवसेनेचा कार्यकर्ता म्हणून काम करायचे आहे.माझ्यासह सर्व सहकारी जळगावात मशाल पेटवू.मला आणि माझ्या सर्व कार्यकर्त्यांना शिवसेनेने सामावून घेतले आहे त्याबद्दल मी उद्धव ठाकरेंचे आभार मानतो असे उन्मेश पाटील यांनी म्हटले आहे.