कर्तव्याची जाण व खाकीतील माणुसकी जोपासून पोलीस उपनिरिक्षक प्रदीप बोरूडे यांची कौतुकास्पद कामगिरी
जळगाव-पोलीस नायक (प्रतिनिधी) :-
दि.१२ जून २४ बुधवार
कर्तव्याची जाण व खाकीतील माणुसकी दाखवत येथील पोलीस रामानंदनगर पोलीस स्टेशनचे कार्यरत असलेले पोलीस उपनिरिक्षक प्रदीप बोरूडे व त्यांचे सहकारी अंमलदार जितेंद्र राठोड यांच्या तत्परतेने सोशल मीडियाच्या माध्यमातुन ७० वर्षीय वृद्ध महिलेला २४ तासात तिच्या परिवाराच्या स्वाधीन करण्याची कौतुकास्पद कामगिरी करण्यात आली आहे.यानिमित्ताने पोलीस उपनिरिक्षक प्रदीप बोरूडे व त्यांचे सहकारी अंमलदार जितेंद्र राठोड यांचे सर्व थरातून कौतुक होत आहे.दरम्यान या कामगिरीबद्दल त्याचे यावल येथील रहिवासी व पोलीस बॉईज असोसिएशन जळगाव जिल्हा उपाध्यक्ष भूषण नगरे यांच्या वतीने शाल व फुलगुच्छ देऊन त्यांचा नुकताच सत्कार करण्यात आला.
दरम्यान शहरातील वाल्मीक नगरातील वयोवृद्ध महिला ठकुबाई देवचंद सपकाळे या एकट्याच वास्तव्यास असून शनिवारी रात्रीच्या सुमारास त्या घरातून बाहेर पडल्या व शिरसोली रस्त्याने पायी चालत थेट आदर्श नगर परिसरात गेल्या.मध्यरात्री साडेबारा वाजेच्या सुमारास वृद्ध महिला एकटीच परिसरात फिरत असल्याचे नागरिकांना लक्षात येताच परिसरातील नागरिकांनी रामानंद नगर पोलिसांना माहिती दिली.यावेळी रात्रीच्या वेळी गस्तीवर असलेले पोलीस उपनिरीक्षक प्रदीप बोरुडे व त्यांचे सहकारी अमलदार जितेंद्र राठोड यांनी त्या ठिकाणी धाव घेत त्यांनी वृद्ध महिलेची चौकशी केली असता त्यांना केवळ त्यांचे नाव सांगता येत होते.आपला पत्ता आणि नातेवाईकांबद्दल त्यांना विचारले असता त्यांना सांगता येत नव्हते त्यामुळे पोलिसांनी त्यांना ताब्यात घेत त्यांना महानगरपालिकेच्या श्री संत गाडगेबाबा शहरी बेघर निवास केंद्र येथे दाखल केले.रात्रभर बेघर निवारा केंद्रात वृद्ध महिलेला दाखल केल्यानंतर पोलिसांनी संबंधित महिलेचा फोटो सोशल मीडियावर व्हायरल केला व त्यानुसार ठकूबाई यांच्या नातेवाईकांनी त्यांची ओळख पटवीत ती वृद्ध महिला आपली नातेवाईक असल्याचे पोलिसांना सांगितले.त्यानुसार रविवार दुपारच्या सुमारास वृद्ध महिलेला नातेवाईकांना बेघर निवारा केंद्रातून महिलेला ताब्यात घेत घरी नेले.पोलिसांच्या अशा माणुसकीतून केलेल्या कार्यतत्परतेने २४ तासातच वृद्ध महिलेला त्याच्या परिवाराच्या स्वाधीन करण्यात यश आले असून या घटनेबाबत जळगाव पोलिसांचे कौतुक केले जात आहे.
