फैजपूर पोलीस पाटील संघटनेची निवड बिनविरोध !! अध्यक्षपदी लक्ष्मण लोखंडे तर उपाध्यक्षपदी उत्तरा कोळी !!

यावल-पोलीस नायक (प्रतिनिधी)  :-

दि.०१ जानेवारी २६ गुरुवार

तालुक्यातील फैजपूर विभागातील पोलीस पाटील संघटनेची नूतन कार्यकारिणी नुकतीच जाहीर करण्यात आली असून संघटनेच्या अध्यक्षपदी लक्ष्मण लोखंडे यांची तर उपाध्यक्षपदी उत्तरा कोळी तर सचिव पदी सुरेश खैरनार,खजिनदार दिनेश बाविस्कर व कार्यकारी सदस्य संतोष सुरवाडे,फारूक तडवी,संगीता दांडगे यांची सर्वानुमते निवड करण्यात आली आहे.

या निवडीमुळे पोलीस पाटील संघटनेत नवचैतन्य निर्माण झाले असून विभागातील प्रलंबित प्रश्न मार्गी लागण्याची अपेक्षा व्यक्त होत आहे.नूतन अध्यक्ष लक्ष्मण लोखंडे यांनी निवडीनंतर बोलताना सांगितले की,”पोलीस पाटील आणि प्रशासन यांच्यातील दुवा म्हणून संघटना अधिक प्रभावीपणे काम करेल.पोलीस पाटलांच्या समस्या सोडवण्यासाठी आणि त्यांना योग्य मान-सन्मान मिळवून देण्यासाठी आम्ही कटिबद्ध आहोत.”तर उपाध्यक्षपदी निवड झालेल्या उत्तरा कोळी यांनीही महिला पोलीस पाटलांच्या प्रश्नांना प्राधान्य देणार असल्याचे नमूद केले.या निवडीबद्दल तालुक्यातील विविध क्षेत्रातील मान्यवरांनी नूतन पदाधिकाऱ्यांचे अभिनंदन केले आहे.या निवडीप्रसंगी फैजपूर विभागातील विशाल जवरे,सुरेश खैरनार,हरीश चौधरी,फारूक तडवी,दिनेश बाविस्कर,प्रफुल्ला चौधरी,उत्तरा कोळी,मीना चव्हाण,कैलास बादशाह,पुरुषोत्तम पाटील,संतोष सुरवाडे,निलेश सोनवणे,रवींद्र साळवे,लक्ष्मण लोखंडे,अरुण पाटील सह सर्व पोलीस पाटील उपस्थित होते.प्रसंगी फैजपूर पोलीस स्टेशनचे सहाय्यक पोलीस निरीक्षक रामेश्वर मोताळे व उपनिरीक्षक सय्यद साहेब यांनी अध्यक्ष उपाध्यक्ष कार्यकारिणीचे स्वागत केले.संघटनेची ही नवी फळी गावागावांतील कायदा व सुव्यवस्था राखण्यासाठी पोलिसांना अधिक मोलाचे सहकार्य करेल असा विश्वास यावेळी व्यक्त करण्यात आला.

दरम्यान फैजपूर विभागातील पोलीस पाटील संघटनेच्या नूतन कार्यकारिणीने पदभार स्वीकारताच पोलीस पाटलांच्या आर्थिक आणि सामाजिक सुरक्षेसाठी दोन महत्त्वपूर्ण उपक्रम राबवण्याचा संकल्प केला आहे.संघटनेचे नूतन अध्यक्ष लक्ष्मण लोखंडे आणि उपाध्यक्ष उत्तरा कोळी यांच्या नेतृत्वाखाली “पोलीस पाटील बचत गट” आणि “सामूहिक गट विमा” योजना सुरू करण्यात येणार आहे.पोलीस पाटलांना आर्थिक अडचणीच्या वेळी तात्काळ मदत मिळावी आणि त्यांच्यामध्ये बचतीची सवय लागावी या उद्देशाने हा विशेष बचत गट स्थापन केला जाणार आहे व या माध्यमातून सदस्यांना अल्प व्याजात कर्ज उपलब्ध करून देण्याचा संघटनेचा मानस आहे.तसेच गावपातळीवर कायदा व सुव्यवस्था राखताना पोलीस पाटलांना अनेकदा जोखमीची कामे करावी लागतात.कर्तव्यावर असताना एखादी दुर्घटना घडल्यास त्यांच्या कुटुंबाला आर्थिक आधार मिळावा यासाठी सर्व सदस्यांचा ‘सामूहिक गट विमा’ उतरवला जाणार आहे.निवडीनंतर झालेल्या बैठकीत बोलताना अध्यक्ष लक्ष्मण लोखंडे म्हणाले की,”केवळ पद मिळवणे हा आमचा उद्देश नसून आपल्या पोलीस पाटील बांधवांचे भविष्य सुरक्षित करणे ही आमची प्राथमिकता आहे.बचत गट आणि विमा योजनेमुळे पोलीस पाटलांच्या कुटुंबाला एक भक्कम आधार मिळेल.”या नाविन्यपूर्ण उपक्रमांचे फैजपूर विभागातील सर्व पोलीस पाटलांकडून स्वागत होत असून प्रशासकीय स्तरावरही या स्तुत्य उपक्रमाची चर्चा होत आहे.