पिंपरुड शिवारात विजेच्या धक्क्याने एकाचा मृत्यू !! दोघांविरुद्ध गुन्हा दाखल !! सुरक्षिततेकडे दुर्लक्ष जिवावर बेतले !! डमी इलेक्ट्रिक पोल काढतांना घडली दुर्दैवी घटना !!

पाडळसे ता.यावल-पोलीस नायक (वार्ताहर) :-

दि.१० मे २६ रविवार
विद्युत खांबाचे (इलेक्ट्रिक पोल) काम सुरू असताना कमालीचा हलगर्जीपणा केल्यामुळे एका कामगाराचा मृत्यू झाल्याची खळबळजनक घटना पिंपरुड शिवारात घडली आहे.या प्रकरणी कामावर असलेल्या इतर दोन साथीदारांच्या निष्काळजीपणामुळे हा अपघात झाल्याचा ठपका ठेवत फैजपूर पोलिसांनी त्यांच्याविरुद्ध गुन्हा दाखल केला आहे.

मिळालेल्या माहितीनुसार दि.२६ एप्रिल २६ रोजी सकाळी ८:३० वाजेच्या सुमारास संतोष त्र्यंबक कोळी,देवेंद्र सुरवाडे व मयूर नेहते हे तिघे जण पिंपरुड शिवारात रस्त्यालगत असलेले डमी इलेक्ट्रिक पोल काढण्याचे काम करत होते.डमी पोल काढताना शेजारीच असलेल्या जिवंत विद्युत वाहिनीचा (मेन लाईन) प्रवाह खंडित करणे किंवा योग्य ती सुरक्षा यंत्रणा वापरणे आवश्यक होते.मात्र देवेंद्र सुरवाडे व मयूर नेहते यांनी सुरक्षिततेचे कोणतेही नियम न पाळता कामात हलगर्जीपणा केला.या दोघांच्या निष्काळजीपणामुळे काम करत असताना संतोष त्र्यंबक कोळी यांना जिवंत विद्युत वाहिनीचा जोराचा धक्का लागला व यात ते गंभीर जखमी होऊन जमिनीवर कोसळले त्यांना तातडीने उपचारासाठी रुग्णालयात नेण्यात आले मात्र दुर्दैवाने त्यांचा मृत्यू झाला.या घटनेमुळे परिसरात शोककळा पसरली असून संताप व्यक्त केला जात आहे.

या घटनेची माहिती मिळताच पोलिसांनी घटनास्थळी भेट देऊन पंचनामा केला.प्राथमिक तपासात कामाच्या ठिकाणी सुरक्षिततेची कोणतीही साधने नसल्याचे आणि देवेंद्र सुरवाडे व मयूर नेहते यांच्या बेजबाबदार वर्तनामुळे संतोष कोळी यांचा जीव गेल्याचे निष्पन्न झाले.यावरून फिर्यादीच्या तक्रारीनुसार फैजपूर पोलिसांनी आरोपी देवेंद्र सुरवाडे व मयूर नेहते या दोघांविरुद्ध भारतीय न्याय संहितेच्या (पूर्वीचे IPC) संबंधित कलमान्वये गुन्हा नोंदवला आहे.

मजुरांच्या जीवाशी खेळ कधी थांबणार?
विद्युत महावितरणच्या कंत्राटी कामांमध्ये अनेकदा मजुरांना साधी हातमोजे किंवा हेल्मेटही दिले जात नसल्याचे समोर आले आहे. “केवळ घाईघाईत काम उरकण्याच्या नादात एका गरीब मजुराचा जीव गेला आहे याला जबाबदार असणाऱ्यांवर कठोर कारवाई व्हावी,” अशी मागणी परिसरातून होत आहे

—