आषाढी एकादशीनिमित्ताने पंढरपूर यात्रेसाठी पाच हजार विशेष बस

सदरील बसेस २५ जून ते ५ जुलै २३ या दरम्यान या विशेष गाड्या धावणार असून वाखरी येथील माऊलींच्या रिंगण सोहळ्यासाठी दि.२७ जून मंगळवार रोजी २०० अतिरिक्त बस उपलब्ध करून देण्यात आल्या आहेत.यात्रेसाठी मुंबईसह पुणे,नाशिक,औरंगाबाद,नागपूर,अमरावती या सहा प्रदेशातून बसेसचे नियोजन करण्यात आले आहे.दरम्यान यात्रेनिमित्त राज्यातून पंढरपूर येथे जाणाऱ्या वारकरी आणि भक्तांनी या बस सेवेचा लाभ घ्यावा असे आवाहन एसटी महामंडळाकडून करण्यात आले आहे अशी माहिती एसटी महामंडळाने दिली आहे.औरंगाबाद प्रदेशातून १,२००,मुंबई ५००,नागपूर १००,पुणे १,२००,नाशिक १ हजार आणि अमरावती येथून ७०० अशाप्रकारे यात्रेसाठी विशेष बसचे नियोजन करण्यात आले आहे.

पंढरपूर यात्रेसाठी राज्यभरातील लाखो भाविकांसाठी विविध विभागांतून गाड्या सोडण्यात येणार असून वारकरी,भाविक तसेच पर्यटकांची होणारी गर्दी पाहता एकाच स्थानकावर गर्दी होऊ नये यासाठी यात्रा कालावधीत पंढरपूर येथे चंद्रभागा,भिमा,पांडुरंग (आयटीआय कॉलेज) व विठ्ठल कारखाना यात्रा स्थानक अशी चार तात्पुरती बस स्थानके उभारण्यात येणार आहेत.दरम्यान यात्रा काळात बस स्थानकावर पिण्याचे पाणी,सुलभ शौचालय,संगणकीय आरक्षण केंद्र,चौकशी कक्ष,मार्गदर्शन फलक अशा विविध सोयी सुविधा पुरविण्यात येणार असून जास्तीत जास्त प्रवाशांनी एसटीच्या सुरक्षित प्रवासी सेवेचा लाभ घ्यावा असे आवाहन एसटी महामंडळाकडून करण्यात आले आहे.