मणिपूरमधील महिलांवरील अत्याचाराचे विदारक दृश्य घृणास्पद” शरद पवार यांनी व्यक्त केला संताप

या घटनेचा व्हिडीओ व्हायरल झाल्यानंतर यावर देशभरातून तीव्र प्रतिक्रिया उमटत असतांना राष्ट्रवादी काँग्रेसचे अध्यक्ष शरद पवार यांनीदेखील या घटनेवरून संताप व्यक्त केला आहे.शरद पवार यांनी यासंबंधी एक ट्वीट केले असून त्यात त्यांनी म्हटले आहे की,मणिपूरमधील विदारक दृश्य पाहून मन दुखावले आहे.विशेषत: महिलांवरील अत्याचाराचे विदारक दृश्य घृणास्पद असल्यामुळे हीच वेळ आहे संघटित होण्याची, आपला आवाज उठवण्याची आणि मणिपूरच्या लोकांसाठी न्याय मागण्याची.मणिपूरमध्‍ये शांतता प्रस्थापित करण्‍यासाठी पंतप्रधान कार्यालयासह गृह विभागाने तातडीने आवश्‍यक कारवाई करणे आवश्‍यक असल्याचे त्यांनी नमूद केले आहे.या ट्वीटसह शरद पवार यांनी भारतरत्न डॉ.बाबासाहेब आंबेडकर यांचे एक वाक्य लिहिले आहे “माणुसकीशिवाय तुझा गौरव व्यर्थ आहे” हे बाबासाहेबांचे वाक्य शरद पवार यांनी त्यांच्या ट्वीटमध्ये लिहिले आहे.

मणिपूरमधील या संतापजनक घटनेबद्दल माहिती देताना पोलीस अधीक्षक के.मेघचंद्र सिंह यांनी निवेदन जारी करतांना म्हटले आहे की,दोन महिलांना नग्न करून धिंड काढल्याचा व्हिडीओ व्हायरल होत आहे ही घटना ४ मे २०२३ रोजी घडली यानंतर सशस्त्र अज्ञात आरोपींविरोधात अपहरण,सामूहिक बलात्कार आणि हत्येचा गुन्हा दाखल करण्यात आला आहे.या प्रकरणाचा तपास सुरू असून राज्य पोलीस दल आरोपींचा शोध घेत आहे व आरोपींना अटक करण्यासाठी सर्वोतपरी प्रयत्न सुरू आहेत.