माळेगाव कॉलेज परिसर आणि बसस्थानक परिसरात खुलेआम मद्यपान !! पानटपऱ्यांवर कारवाईची नागरिकांची जोरदार मागणी !!

सानी पटेल,पोलीस नायक

बारामती जिल्हा (प्रतिनिधी) :-

दि.०१ जून २६ सोमवार

माळेगाव शहरातील महाविद्यालय परिसर व कॅनॉल परिसर तसेच मुख्य बसस्थानकाच्या आसपास सार्वजनिक ठिकाणी मद्यपान आणि धूम्रपानाचे प्रकार वाढत असल्याची चर्चा सध्या नागरिकांमध्ये रंगू लागली आहे.शिक्षणाचे केंद्र समजल्या जाणाऱ्या कॉलेज परिसरात तसेच नागरिक आणि प्रवाशांची मोठ्या प्रमाणावर वर्दळ असलेल्या बसस्थानक परिसरात अशा प्रकारच्या घटना घडत असल्याने नागरिकांमध्ये तीव्र नाराजी व्यक्त केली जात आहे.

स्थानिक नागरिकांच्या माहितीनुसार,महाविद्यालय परिसरालगत असलेल्या कॅनॉलच्या बाजूला काही तरुण आणि मद्यपी व्यक्ती बसून मद्यपान करत असल्याचे अनेक वेळा निदर्शनास येत आहे.या परिसरात महाविद्यालयीन विद्यार्थी, विद्यार्थिनी, शिक्षक आणि पालकांची नियमित ये-जा असते व अशा परिस्थितीत सार्वजनिक ठिकाणी सुरू असलेल्या या प्रकारांमुळे परिसरातील शैक्षणिक वातावरण दूषित होत असल्याची भावना व्यक्त केली जात आहे.

नागरिकांचे म्हणणे आहे की,काही पानटपऱ्यांवर सिगारेट,तंबाखूजन्य पदार्थ आणि इतर व्यसनाधीनतेशी संबंधित वस्तू सहज उपलब्ध होत असल्यामुळे तरुण वर्ग चुकीच्या मार्गाकडे वळत आहे.शाळा आणि महाविद्यालय परिसरात अशा वस्तूंची विक्री रोखण्यासाठी नियम असतानाही त्यांची प्रभावी अंमलबजावणी होत नसल्याचा आरोप नागरिकांकडून केला जात आहे.

विशेष बाब म्हणजे कॉलेज परिसरापुरतेच हे प्रकार मर्यादित नसून माळेगाव बसस्थानक परिसरातही काही व्यक्तींकडून खुलेआम मद्यपान आणि धूम्रपान केले जात असल्याची चर्चा आहे.बसस्थानक हे गावातील सर्वात महत्त्वाच्या सार्वजनिक ठिकाणांपैकी एक असून येथे महिला,विद्यार्थी,ज्येष्ठ नागरिक आणि विविध भागांतून येणाऱ्या प्रवाशांची दिवसभर मोठी गर्दी असते व अशा ठिकाणी मद्यधुंद अवस्थेत फिरणाऱ्या व्यक्तींमुळे सामान्य नागरिकांना त्रास सहन करावा लागत असल्याचे सांगितले जात आहे.

स्थानिक व्यापारी आणि नागरिकांच्या म्हणण्यानुसार,काही व्यक्ती सार्वजनिक ठिकाणी मद्यपान करून गोंधळ घालतात,मोठ्या आवाजात बोलतात आणि परिसरातील शांतता भंग करतात व त्यामुळे नागरिकांमध्ये भीतीचे वातावरण निर्माण होत असून महिलांनाही असुरक्षिततेची भावना निर्माण होत असल्याचे सांगितले जात आहे.

नागरिकांचे असेही म्हणणे आहे की,संबंधित भागात पोलीस गस्त अधिक प्रभावीपणे राबविण्याची आवश्यकता आहे.कॉलेज परिसर,कॅनॉल परिसर आणि बसस्थानक परिसरात नियमित पाहणी केल्यास अशा प्रकारांना आळा बसू शकतो.तसेच नियमांचे उल्लंघन करणाऱ्या पानटपऱ्यांची तपासणी करून आवश्यक त्या कायदेशीर तरतुदींनुसार कारवाई करण्यात यावी अशी मागणीही होत आहे.

शहरातील सुजाण नागरिकांनी माळेगाव पोलीस प्रशासन,स्थानिक स्वराज्य संस्था आणि संबंधित विभागांनी संयुक्त मोहीम राबवून सार्वजनिक ठिकाणी मद्यपान करणाऱ्यांवर कठोर कारवाई करावी,व्यसनाधीनतेला प्रोत्साहन देणाऱ्या बेकायदेशीर प्रकारांवर नियंत्रण आणावे आणि शैक्षणिक व सार्वजनिक परिसर व्यसनमुक्त ठेवण्यासाठी विशेष उपाययोजना कराव्यात अशी मागणी केली आहे.महाविद्यालयीन परिसर हा विद्यार्थ्यांच्या उज्ज्वल भवितव्याचा पाया असतो.त्याच परिसरात व्यसनाधीनतेचे प्रकार वाढत असतील तर ही अत्यंत चिंतेची बाब आहे.दुसरीकडे बसस्थानकासारख्या सार्वजनिक ठिकाणीही अशा घटना घडत असतील तर प्रशासनाने त्याकडे गांभीर्याने पाहण्याची गरज असल्याचे नागरिकांचे मत आहे.

नागरिकांचा संतप्त सवाल

“कॉलेज परिसर,कॅनॉल परिसर आणि बसस्थानक परिसरात खुलेआम मद्यपान व धूम्रपान सुरू असेल तर कायद्याचा धाक नेमका कुठे आहे ? संबंधित विभागांनी तात्काळ कारवाई करून अशा प्रकारांना आळा घालावा.”