फैजपूर-पोलीस नायक (प्रतिनिधी) –
दि.१५ मे २६ गुरुवार
आगामी काळात साजरे होणारे विविध सण आणि उत्सवांच्या पार्श्वभूमीवर फैजपूर उपविभागातील कायदा व सुव्यवस्था चोख राखण्यासाठी पोलीस प्रशासनाने कंबर कसली असून याच अनुषंगाने उपविभागीय पोलीस अधिकारी अनिल बडगुजर यांच्या अध्यक्षतेखाली काल दि.१४ मे रोजी फैजपूर पोलीस स्टेशन अंतर्गत सर्व पोलीस पाटलांची महत्त्वपूर्ण आढावा सभा संपन्न झाली.या सभेत सण-उत्सव शांततेत पार पाडण्यासाठी विविध मार्गदर्शक सूचना देण्यात आल्या तसेच रस्त्याने वाढते अपघाताचे सत्र व त्याबाबत सुरक्षा तसेच गावामध्ये अनधिकृतपणे पुतळे बसविले जाणार नाही याबाबत चर्चा करण्यात आली.
सदर बैठकीत डीवायएसपी अनिल बडगुजर म्हणाले की,पोलीस पाटील हा पोलीस प्रशासन आणि जनता यांच्यातील महत्त्वाचा दुवा आहे.गावपातळीवर होणाऱ्या प्रत्येक हालचालीवर पोलीस पाटलांनी बारीक लक्ष ठेवावे.सण-उत्सवाच्या काळात गावात सामाजिक सलोखा बिघडणार नाही याची खबरदारी घ्यावी असे नमूद केले.प्रसंगी अफवांना थारा देऊ नका,सोशल मीडियावरून पसरणाऱ्या चुकीच्या बातम्या किंवा अफवांकडे दुर्लक्ष करून अशा प्रवृत्तींची माहिती तातडीने पोलीस स्टेशनला देण्याचे निर्देश देण्यात आले.तसेच प्रत्येक गावात शांतता समितीची बैठक घेऊन वादाचे मुद्दे सामोपचाराने सोडवण्याचे आवाहन करण्यात आले.मिरवणुकीच्या मार्गावर आणि गर्दीच्या ठिकाणी सीसीटीव्ही कॅमेरे लावण्याबाबत मंडळांना प्रोत्साहित करण्याच्या सूचना देण्यात आल्या.उत्सवाच्या काळात आवाजाच्या मर्यादेचे पालन करण्याबाबत कडक अंमलबजावणी करण्याचे आदेश देण्यात आले.या सभेत उपस्थित पोलीस पाटलांनी देखील आपल्या भागातील समस्या मांडल्या.डीवायएसपी अनिल बडगुजर यांनी या समस्यांचे निराकरण करण्याचे आश्वासन दिले आणि “पोलीस प्रशासन तुमच्या पाठीशी खंबीरपणे उभे आहे,” असा विश्वास दिला.यावेळी पोलीस पाटील सुरेश खैरनार, प्रसन्नकुमार पाटील,रवींद्र सावळे,विशाल जवरे,किरण वानखेडे,पुरुषोत्तम पाटील,लक्ष्मण लोखंडे,संतोष सुरवाडे,संजय चौधरी,नरेश मासोळे,तुषार चौधरी,उत्तरा कोळी, हरीश चौधरी,प्रभारी अधिकारी सय्यद मैनुद्दीन,ठाणे अंमलदार मोती पवार,गोपनीय विभागाचे राहुल नार्वेकर यांच्यासह फैजपूर पोलीस स्टेशन अंतर्गत सर्व पोलीस पाटील, पोलीस निरीक्षक आणि पोलीस कर्मचारी मोठ्या संख्येने उपस्थित होते.
